Torotoro haere

Ka whakamahi tō tamaiti i tētahi wāhi ako tuihono haumaru ki te uru ki ētahi o ana rauemi ako me te tūhono ki ōna kaiako. E kīia ana tā mātou wāhi ako tuihono ko Tōku Kura

Kei te whakamahi i te ranunga o ngā ngohe tuimotu me te tuihono. Ka tonoa tō tamaiti ki te torotoro i tōna ao, kaua he noho noa iho i mua i te mata tana mahi. Kei te whakamahi i te whānuitanga o ngā rauemi i te ako tawhiti ki te āwhina i tō tamaiti ki te ako mōna anō, ki tōna ao anō hoki.

Tōku Kura

Ka whakamahi kōrua ko tō tamaiti i te akoranga Tōku Kōhungahunga i Toku Kura. Ka whiwhi koe i te īmēra aunoa hei whakamōhio i a koe ki te whakaurunga o tō tamaiti ki tōna akoranga.

Māu e takiuru mō tō tamaiti mā te whakamahi i tētahi tuakiri ahurei me tētahi kupuhipa. I roto i Tōku Kura ka āhei koe te pāhekoheko ki ngā kaiako, te uru atu ki ngā ihirangi mō te mahi i te taha o tō tamaiti me te kohikohi taunikatanga ako.

Takiuru ki Tōku Kura

Ka taea te takiuru mā te paro i runga ake i te hono nei i te kokonga matau o runga i te whārangi me te tīpako i Tōku Kura.

Ingoakaiwhakamahi: Tau tuakiri ākonga
Kupuhipa: Tau tuakiri ākonga (Ka tonoa ki te tautuhi i te kupuhipa hou.)

I wareware tō kupuhipa/Te huri rānei i tō kupuhipa

Mēnā kua warewaretia tō kupuhipa, mēnā kei te hiahia ki te huri, pāwhiria te hono 'kupuhipa wareware' kei te taha o raro o te mata takiuru.

Ka tukuna he hono tautuhi kupuhipa anō ki te wāhitau īmēra i tukuna ki a mātou.

Te haumaru ā-ipurangi me te kirirarautanga matihiko

Whakarato ai te ipurangi me ētahi atu hangarau matihiko i te mātauranga me ngā painga pāpori ki a kōrua ko tō tamaiti. Heoi anō, he mea nui hoki kia mātau koe ki ngā mōrearea. E akiaki ana i a koe kia rite tonu tō kōrerorero ki tō ākonga mō te whakamahi i te ipurangi i runga i te haumaru. Ki te aroā i ngā tamariki ngā mōrearea ka taea te hanga whakataunga haumaru ake ina whakamahi hongere matihiko.

Ko te kirirarau matihiko noho haepapa, te tangata:

  • ka tiaki i ōna mōhiohio whaiaro ina tuihono
  • he pai ōna whanonga ki ētahi atu ina tuihono
  • ka whakahaere i ngā āhuatanga kei reira pea he mōrearea
  • ka whakawāwā i te pono o ngā rauemi e kitea ana i te tukutuku.

Ka kitea he mōhiohio mā ngā mātua mō te haumaru ā-ipurangi me te whanonga tuihono i te paetukutuku Netsafe.

Ngā rauemi

Ka whiwhi koe i te īmēra aunoa hei whakamōhio i a koe ki te whakaurunga o tō tamaiti ki tōna akoranga Tōku Kōhungahunga. Ka whakapā te kaiako o te tamaiti ki a koe ki te kōrerorero i te whakamahi i te ako tuihono i roto i te mahere ako takitahi a tō tamaiti.

Ka rite tonu te tuku ki a koe i tētahi huinga o ngā rauemi ako kia whakawhaiarotia ki ngā kaingākautanga me ngā hiahia ako o tō tamaiti. Ka hoatu te nuinga o aua rauemi tuku māu e pupuri, engari me whakahoki ngā pukapuka me ētahi atu ngohe, pēnei i ngā panga rākau. Mā mātou e whakamārama he aha ngā rauemi māu e pupuri, he aha hoki ngā mea me whakahoki mai.

Te whakahoki rauemi mā te mēra

  • Ko te tūtohu nei, me whakahoki ngā rauemi kua tukuna ā-mēra ā muri i te 4-6 wiki. Me taki kō ēhea o ngā rauemi i tukuna ki tō tamaiti, me whakahoki mai. Ki te rangirua koe, me pātai atu i ō kaiako.
  • Me taki he mā ngā rauemi, kāore rānei he wāhanga e ngaro ana.
  • Hei ārai i te pakaru, me rau atu ngā rauemi ki roto i ngā peke kirihou kākāriki i mua i te kuhu ki roto i ngā peke tuku ā-mēra.
  • Whakaotia te wāhanga whakahokinga kōrero, tae atu ki ngā whakaahua, ngā ataata me ngā mahi toi mā ō kaiako.
  • Whakamahia te rau wāhinoho i whakaratohia, me te whakarite kia āta kitea ngā kōrero wāhinoho mēra koreutu mō Te Kura.

Ngā rauemi mā ngā mātua

Kei roto i ngā rauemi mā ngā mātua he mōhiohio mō:

  • te whanaketanga tamaiti
  • ngā ariā mō ngā ngohe me ngā wheako mā tō tamaiti.

Kua hoahoatia ā mātou rauemi mā ngā mātua hei tautoko i ngā ako a tō tamaiti puta noa i te roa e whai ana i tā mātou hōtaka, ā, e tono ana mātou kia hokihoki atu koe ki aua rauemi i tō tamaiti e whakaatu ana i ngā kaingākautanga me ngā mōhiotanga hou.

E tika ana me whiwhi ngā kōhungahunga i te tino nui o ngā mahi whakaharatau me te tāruarua, nā reira me tukurua tonu tō whakamahi i aua ariā. Ka kitea te rerekētanga o te āhua i mahi ai tō tamaiti i tētahi ngohe i te rua o ōna tau, i taua ngohe anō ina mahia i te ono tau.

Tūhono ki te whare pukapuka

E wātea ana ā mātou rauemi whare pukapuka ki ngā ākonga kōhungahunga, ki ō rātou mātua me ō rātou kaitirotiro. He pukapuka, he DVD, he moheni, he puka ororongo ā te whare pukapuka hei hoatu taurewa.

Ako kōrero anō mō te tūhono i te whare pukapuka, ka rapu i te putumōhio i Tōku Akoranga.