Ngā kaitirotiro

Mā tō āwhina, ka whakatau ngā kaiako i ngā whāinga ako ka whakaata i ngā kaingākautanga me ngā pūmanawa o tō tamaiti, tae atu ki te āhua noho, ngā uara me ngā whakapono o tō whānau. Tēnā pea ka whakaroha ngā whāinga ako i ngā kaingākautanga o tō tamaiti, ka whakahohe rānei i tētahi wāhi ako hou. Mā ō whakahokinga kōrero mō ngā mea e mahi ana, e kī ana tō tamaiti, mō ōna uauatanga me tōna whakaahu whakamua hoki e āwhina ō kaiako ki te kōwhiriwhiri i ngā whāinga ako me ngā rauemi.

Ka whakamahi kōrua ko tō tamaiti i tētahi wāhi ako tuihono haumaru ki te uru ki ētahi o ana rauemi ako me te tūhono ki ōna kaiako. Kei te whakamahi te ako tuihono i te ranunga o ngā ngohe tuihono, ngā rauemi tā me ngā ngohe. Ka whakamahi kōrua ko tō tamaiti i te hangarau ki te torotoro i tōna ao.

Mēnā kua whai hiahia whakaako tauwhāiti ō tō tamaiti, ka whakawhanaketia tahitia me koe tō hōtaka, me ētahi atu hoki e tautoko ana i te whanaketanga me te oranga o tō tamaiti.

E kīia ana tā mātou wāhi ako tuihono ko Tōku Kura Ka uru kōrua ko tō tamaiti ki ngā rauemi ako tuihono i te akoranga Tōku Kōhungahunga. Ka whai wāhi pea ētahi atu kaiwhakarato mātauranga tuihono ki ngā rauemi ako. Ka whakarongo, ka pānui, ka tūhurahura tō tamaiti i ngā ngohe hou puta noa i te tau.

Ka whakapā tonu ngā kaiako o te tamaiti ki a koe ki te kōrerorero i te whakamahi i te ako tuihono hei wāhanga o te hōtaka ako a tō tamaiti i te taha o ngā rauemi me ngā ngohe tā.

Ka whiwhi koe i te īmēra aunoa hei whakamōhio i a koe ki te whakaurunga o tō tamaiti ki tōna akoranga. Ka ako anō koe mō Tōku Kura ki Torotoro Haere.

Kite kōrero anō mō te ako tuihono.

Ka whiwhi kōrua ko tō tamaiti i te whānuitanga o ngā rauemi mā te mēra ia marama. Ka tīpakona ngā rauemi mā ngā kaiako o tō tamaiti, ā, ka whakawhāitihia ki ōna ake kaingākauatanga, hiahia ako hoki.

Ka hoatu te nuinga o aua rauemi tuku māu e pupuri, engari me whakahoki mai ngā pukapuka me ētahi atu o ngā rauemi. Ka ako anō koe ki te whakahoki i ngā rauemi kua tukuna ā-mēra ki Torotoro Haere.

Puta mai ai he whai wāhitanga ki te tūtaki i ngā kaiako o tō tamaiti me ōna hoa ako nā te whakamahi i ngā wātū akomanga mariko o Tōku Kura. Ina taea, ka whakatūria he hui kotahi rā te roa huri noa i te whenua e āhei ai tō tamaiti te tūtaki i ngā kaiako Te Kura me ērā atu whānau e noho ana i tō takiwā.

Whakapau wā i ia rā i te taha o tō tamaiti.

Ka whai wāhi pea te whānau katoa. Whakamahia te wā ki te:

• pānui ngātahi i ngā kōrero paki
• whakarongo ki te puoro
• tākaro kēmu
• torotoro i te taiao o tō kāinga
• mātakitaki me te whakatenatena i tō tamaiti ki te peita, te tātuhi, te mahi i tētahi panga rānei.

Ka whaihua hoki ki tō tamaiti mēnā kei a ia te wā me te tautoko ki te whakamahi wehe kē i ngā rauemi; hei tauira, te tiro i ngā pukapuka, te mahi te tētahi panga rānei. Me aro tonu ki a ia me tāna mahi, me te whakatītina i tāna e mahi ai.

Nā te mea e ako ana te tamaiti mā te whakaharatau me te tukurua, me wātea ngā rauemi ako kia rite tonu tāna mahi.

Anei mātou hei tautoko i ngā ako a tō tamaiti, hei whakatenatena i te whakapā rite tonu mā tō mātou taiao ako tuihono, mā Tōku Kura, mā te īmēra, te waea, te Kōrerorero Matawā, te mēra rānei.

He waiwai tēnei mea te urupare hei whakarite kia mahi tahi tātou ki te whakawhānui i te hōtaka ako o tō tamaiti. Mā mātou koe e tautoko ki te āwhina i te ako tuihono a tō tamaiti, me te whakatītina i a koe ki te takiuru rite tonu kia hou tonu ai tō mōhio ki ngā ngohe hou me ngā rongo hira.

Ko te pūrere tōtika mō te ako ko tētahi e taea ai e koe:

• te uru ki te ipurangi me Tōku Kura
• te hanga tāhopukanga ororongo me te ataata (e wātea tuihono ana he pūmanawa koreutu)
• me tō whānau te hanga me te takatā tuhinga ki te tautoko i ngā ako a tō tamaiti.

Ko ngā kōwhiringa tino pai rawa ko tētahi rorohiko pōnaho, tētahi pukatuku, tētahi rorohiko papamahi rānei (e mōhiotia ana hoki hei Rorohiko Atamai) me tētahi pukumārō neke atu i te 80GB te rahi me te pūmahara neke atu ki te 4GB, nō te mea kei aua pūrere te nui ake o te taumahinga i ō te nuinga o ngā paparorohiko noa me ngā īPapa.

Ko te painga o te pūrere kawe, ka āhei ngā ākonga me te whānau te ako i te huarahi, arā, te hopu whakaahua o ngā ākonga e mahi ana, te uru ki Tōku Kura me te whakamahi taupānga ka tautoko i ngā mahi ako.

Me whai hononga ipurangi aunui ia tamaiti i tō kainga (kāore te tūhono ā-waea i te tika) me te 30GB o ngā raraunga i te iti rawa i ia marama.

Ka whakarato a Te Kura i te maha o ngā momo pūmanawa me ngā utauta e hiahiatia ana e tō tamaiti kia ako tuihono, me ngā tohutohu mō te whakamahi. Kei roto i ērā atu pūmanawa koreutu me ngā utauta tuihono ka hiahiatia:

• ko te pū whakaahua matihiko, tētahi waea pūkoro whai pū whakaahua rānei
• ko te pūtirotiro tukutuku - e tūtohu ana mātou i te Matāmura Kūkara
• ko te maupane me te hopuoro, tētahi hopuoro kei rō tonu i te rorohiko rānei
• ko te pūmanawa tukatuka kupu – ka taea te tikiake i Microsoft Office koreutu
• ko te pumanawa patu wheori

E wātea ana i Tōku Kura ngā hononga ki ēnei me ētahi atu paetukutuku mō te tikiake pūmanawa kua tūtohutia.

Arā ētahi atu tuemi ka whaihua ki tō tamaiti, pēnei i te:

• urunga ki tētahi pūreretā me tētahi matawai
• pūmanawa whakairoiro, takatā me te tātuhi atahanga
• maupane me te hopuoro, tētahi hopuoro kei rō tonu i te rorohiko rānei
• pūmanawa takatā tuhinga PDF – e wātea ana ētahi kōwhiringa e taea ai e te whānau ki tuhituhi tika ki runga i ngā kōnae PDF me te taiaki mahi me te tukuatu ki Tōku Kura hei tiritiri atu.